Madya! Bisitahun ta ang SIRUMA!

Mag puun sa halabang byahe kan jeep, hasta tumagilid,

pirang beses kang maghugdu asin kaipuhang makiuyun

ang saimung hawak sa pag andar kan sasakyan.

Si medyo lulaun mairikot man talaga ang tulak asin pamayu,

sa paghakalabang tinampong kaipuhan balyuhun nganig makaduman ka sa lugar na ini.

Lantsa , para sa gusto  man mag agi sa mayamang kadagatan.

Alagad pag ika naman nakatumak sa lugar na padudumanan,

Biyung nagsusurulwak sa kagayunan asin sa yaman ang lugar na iniyu,

Magpuun sa kagayunan kang pwesto kaini and mga taong mahihigus asin nagtatarabang tabang,

nangad ang malaen laen na pagkakan na isisirbi saindu.

Turukal kasag, hirimay sira, kurudot ning langka asin hungit nin kadakulang maluto,

tapos malaguk kang maliput na tubig ay abaanang siram mabuhay sa SIRUMA.

Medyo masakit lang ang pagsakdo kan tubig,

pero sa dae matatawarang kahigusan,

pagtatarabangan asin pagpadangat sa kada saru,

gabus nagigibuhan paagi.

Kun saemu sanang masisiripan ang mahiwasung kadagatan,

an saemung mata basug nang maray,

ang init na nag raragitnit asin ang baybay na namumuti.

Likay lang ta baka ika ma-salabay, pwerteng kulug hawak saimung mamatean.

Itong tipong sinasarakit kang biyu sa pagsakat

nin huli ta grabe an pagka-angulo kan tinampo,

hasta garu ka man tinuturulud pag ika pababa na.

pakasakat, saemung masisirayan ang kabilugan kan lugar,

ang inaapod nindang “Ocean view”,

kung saen matatanawan mo ang halawig na katubigan.

Si mga tawong daeng untok sa kakaasikaso,

ang mga boluntaryong nagsapo kan lanug

asin makagutum na byaheng daeng kapagalan na

nagpupurukpok asin nagtatarabangan nganig makahaman ning istaran

para sa saindang tugang.

Pwerte ang init, dikit na uran uran pa pero padagus man giraray ang paghiro

kan mahihigus na taong ini na ginibung instrumento kan Diyos

nganig matabangan ang  mga nangangaipu.

Solamente si oras na dapat ititinir asin ipapahingalu na kuta ninda sa saindang langag,

sinakripisyo nindang itabang sa iba.

Saludo kami saindu.

Kamu itong inaapod na “buhay na bayani”.

Nabubuhay para magpadangat asin magtabang sa iba.

Di bale nang magsapo ning init

Di bale na ang namamating kapagalan

Pero ang pagtabang talaga sa kapwa, natudan na satuya

Ang mayamang kulturang iniyu kan Pilipino dapat tang padanayun sa gabus na oras.

Pwerteng burubayle pa hale ki kuya,

dae sana minamati ang pauy asin ang pagbalad sa saldang,

kundi nagiging kawsa pa kan kaugmahan kan pag iriba.

Sakripisyo man na maray ang pagbuhat asin pagsirining baybay,

Paghalo ning semento asin ang pagsakdo,

Gabus na ini ginigibu ninda ning may kaugmahan sa ngimut asin sa puso.

Sa pirang aldaw man na pag iribahan,

kaipuhan man guiraray magsuruwayan

Dikit na programa ning kaugmahan

Pasasalamat tas ang banal na misa

Asin ang pasasalamat sa boluntaryong nagtarabang

asin mga nagsakripisyo kan saindang pansadiring kamarayan para sa iba.

Ang ngirit na nahaman sa saindang ngimut habang nagpapalitada o kaya nagpapala,

sarung katibayan kan saindang liputok na pagkamuut niyato sa lambang saru,

Asin ang kada ganut na nagbubulus, nag sisimbulo kan pagkakasararu ta bilang aki kan kagurangnan.

♫♪♫♪ kan ako sadit pa.. sadit ka pa man, nagkarawat kita ning kudut kudutan… ♪♫♪♫♪

sarung kantang nawalat sa sakuyang hutok habang kami pauli na,

saru sa mga kinanta kan taga-Taligra,

sarung pasasalamat asin sa biyung kaugmahang saindang namatean sa pagtatarabangan.

Pwerteng baraylihan asin dae napuputol na kaugmahan,

naghirit pa si mga paradalan,

maray sanang dakul palan balun si tatay,

sarung maurag na parakanta asin para gitara.

Sa pinag sugpun sugpung lamesa,

iniluwag ang pwerteng maluto asin panira,

harangilid si mga tao asin nakahada nang mag hungit ning labu- labu.

Ang pinag sugpun sugpung lamesa asin pagkakasararu kan kada saru,

Ang pinag sugpun sugpung pagkamoot kaning mga taong ini

Na nagtao ning panibagung pag laum sa kada saru na sarung aldaw,

Mayu nang magugutum asin gabus sa satuyang mga tugang may tultol nang maiistaran.  

♪♫♪♫ Gawad Kalinga, Isang milyong bayani, isang milyong bayani, walang iwanan, walang iwanan, hohaaa!!!!

Para sa isang milyong bayani!!! Hohaaa!!! Mabuhay tayong lahat!!!

#GK Ocean view at Taligra, Poblacion, Siruma, Camarines Sur.

Sarung eksperyensang makakadagdag sa sakuyang buhay,

Naghatud ning kaugmahan baku lang sako kundi sa sakuyang mga tugang.